«Yevrovideniye» adlı halqara yarışınıñ teşkilâtçıları qırımlı ukrain yırcısı Camalanıñ «1944» adlı yırında bozuvlarnı tapmadı. Bu aqta Avropa haber etici birligi Twitterde bildirdi.
Teşkiliy gruppa yırnıñ metinini teşkerip, yarış qaidelerini bozacaq bir şey tapamadı.
Bundan evel, «Yevrovideniye - 2016» yarışınıñ ukrain milliy saylavı yolbaşçısı Natalya Françuk, yır siyasiy hususiyetlerini taşığanınen bağlı izaatlarnı red etti.
«1944» muzıkalı eseri stalin rejimi tarafından qırımtatar halqına qarşı yapılğan repressiyalar aqqındadır. Rusiye Federatsiyasınıñ devlet şurası, Camala «Yevrovideniye - 2016» saylav turını keçken soñ, halqara yarışnıñ teşkilâtçılarına sürgünlik aqqında yırını yarışqa musaade etmemege muracaat etti.
2016 senesi mayıs 10 ve 12 künleri Stokgolm şeerinde mezkür yarışınıñ yarıfinalı, mayıs 14 künü ise finalı keçirilecek.
