Avropa Şurasınıñ tışqı işler nazirleri, Rusiyege nisbetten siyasetiniñ qurulması boyunca bir ağızdan 5 printsipni uyğunlaştılar. Bu aqta, mart 14 künü, nazirlerniñ Brüsselde keçirilgen körüşüvlerinden soñ, Avropa Birliginiñ tışqı işleri boyunca baş vekili Federika Mogerini bildirdi.
Birinci printsip - Rusiye 2015 senesi fevral ayında imzalanğan Minsk añlaşmalarını ürmet etip, olarnı ömürge keçirmek kerek, Brüssel ise Qırım işğalini qabul etmez.
Qalğan printsipler Avropa Birliginiñ «şarq işdeşleri ve başqa qomşuları ile tizilgen munasebetleriniñ küçleştirüvi» ve Avropa Birligi energetik mustaqilliginiñ quvetleştirüvinen bağlı.
Mogerininiñ sözlerine binaen, Avropa Şurasınıñ nazirleri Suriye çatışmasına ya da terrorizmge qarşılıq kösterüv kibi tışqı siyasetinen bağlı bazı meselelerde Rusiye ile işbirlik qurmaq kerekligini qabul ettiler.
Beşinci printsip ise, «Rusiye vatandaşlıq cemiyetine destek köstermek istegidir», - dep qayd etti Federika Mogerini.
Mart 14 künü, Avropa Birliginiñ tış işleri boyunca nazirleri Brüsselde körüşüv keçirdiler. Onıñ çersivesinde Rusiye - Avropa arasındaki munasebetleri boyunca umumiy yekün çıqarıldı. Diplomatlarnıñ soñki böyle toplaşuvı bir yıl evel ötkerilgen edi.
