Mart 14 künü şeher makemesi, «Hizb ut-Tahrir» işiniñ mabüsi Ruslan Zeytullayevniñ apis müddetini devam ettirdi. Bu aqta, Qırım.Aqiqat agentligine, advokat Emil Kürbedinov bildirdi. Belli ki, o, şahsiy sebeplerden makeme oturışında iştirak etip olamadı.
«Apis müddetini uzattılar, amma şimdilik konkret künni aytıp olamam. Müddetni bir ya da eki ayğa uzattılar», - dep ayttı Kürbedinov.
Onıñ sözlerine köre, mart 15 künü, makeme, «Hizb ut-Tahrir» işiniñ başqa mabüsleri Rustem Vaitovnıñ, Nuri Primovnıñ ve Ferat Sayfullayevniñ apis müddetini baqacaq.
Haber etilgenine köre, olar, 2015 senesi yanvar ayınıñ soñunda apiske alınğan ediler. Olarnıñ episi Rusiye Federatsiyasınıñ 205.5 Qanunını bozğanlarında qabaatlanmaqta. Bu qanunda terroristik teşkilâtını meydanğa ketirmesi ve onıñ faaliyetinde iştirak etmesi aqqında aytılmaqta. Şimdiki vaqıtta olar apiste bulunalar. Qırım advokatı, Emil Kürbedinovnıñ aytqanına köre, şu üç şahıs bir zamanları Ukraina telükesizlik hızmetiniñ celpini çekken edi, amma «Hizb ut-Tahrir» teşkilâtınen bağları öyle de isbatlanmağan edi.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
