Kiyev şeherinde yaşağan 27 aileniñ balaları, qırımtatar tilinde neşir etilgen «Armançıq» adlı jurnalına bedava abuneni elde ettiler. Bu aqta, Qırım. Aqiqat agentligine «Qırım ailesi» adlı cemaat teşkilâtınıñ medeniy - maarifçi merkezi yolbaşçısı Anife Kurtseitova bildirdi.
«27 aile - bu merkezimizniñ aman-aman 40 balası», - dep ayttı o.
Kurtseitovanıñ qayd etkenine köre, adları belgisiz qalğanını istegenler, Kanadada yaşağan qırımtatar diasporasınıñ vekilleri, «Armançıq» jurnalına abune olmaq içün 150 dollar bağışladı.
Bunıñnen bir sırada, o, Aqmescitte neşir etilgen jurnalınıñ nushaları Kiyev şeherine nasıl ketirilgenini aytmağa istemedi. «Bu menim sırım», - dep qayd etti Anife Kurtseitova.
Keçenleri, yanvar ayında «Armançıq»nıñ teessisçisi ve baş muarriri Ediye Müslimova qayd etkeni kibi, 2016 seneni abunecilerniñ sayısı 6000- den 3500 - ge tüşken.
«Armançıq» qırımtatar tilinde çıqqan yekâne glânets bala jurnalıdır. 2011 senesinden neşir etilip başlandı, 2012 senesi abune boyunca tarqatılmaqta.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
