Kezlevde aqşam saatlerge elektrik söndürüviniñ yañı cedveli tizilgen.
Şeher memuriyetiniñ cemaatçılıq ve kütleviy haber vastaları boyunca bölüginiñ bildirgenine köre, endiden başlap, elektrikniñ söndürme müddeti bir saat olacaq. Elektrik, 18:00 - 22:00 saatleri içinde kesile bile.
«İçtimaiy adaletni saqlamaq içün, cedvel er afta deñişecek», - qayd eteler memuriyette.
Keçenlerde, şeer sakinleri, elektrikniñ kesilmesinen bağlı umumiy cedvelni elde etken ediler, o vaqıt o, elektrik aletlerniñ tamir işleri yapılması sebebinden tizilgen edi.
Qırımda 2015 senesiniñ noyabr 22 kününden başlap Ukrainadan elektrik berilmesiniñ toqtatılması sebebinden Fevqulade Vaziyet kirsetilgen. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
