Rusiye nezareti astında bulunğan Qırım akimiyeti, yarımadada ukrain ve qırımtatar olğan er şeyni yoq etkenlerini tasdıqladılar. Buña misal olaraq Yalta şeerinde Lesâ Ukrainkanıñ müzeyinen bağlı vaqialarnı ketirmek mümkün. Bu aqta Ukraina medeniyet nazirliginiñ baş - naziri Vâçeslav Kirilenko bildirdi.
«İşğal etici akimiyet Qırımda bütün qırımtatar ve ukrain varlığını yoq etmekte. Lesâ Ukrainkanıñ müzeyi ise, buña daa bir delil oldı», - dep yazdı nazir Twitterde.
Müzey teessisçisi, Svetlana Köçerganıñ haber etkenine köre, Rusiye nezareti astında bulunğan yarımadada yerleşken Lesâ Ukrainkanıñ müzeyi öz köntseptsiyası, çalışma şekilini deñiştire bile. Fevralnıñ başından müzey tamir işleri sebebinden qapatılğan, resmiy olaraq o, 2017 senesiniñ soñuna qadar çalışmaycaq.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
