Qırımdaki MREOnıñ hadimleri cedvel boyunca çalışqanlarına baqmadan, işlerini becermege yetiştirmeyler. Bu al keleyatqan aydavcılarnıñ miqdarınen bağlıdır. Bu aqta Qırımdaki GİBDD MVDniñ rusiye idaresiniñ reisi Anatoliy Börisenko bildirmekte.
«Bizim bazı vatandaşlarımız bu işlerini soñuna qadar uzatqanları içün, elbette böyle sıralar peyda oldı. Şimdiki vaqıtta, adamlarnıñ ihtiyacları bizim yapıp olacağımızdan çoqtır. İnsanlar bu añnı soñuna qadar uzatıp keleler», - dep izaatlay Börisenkonı Novosti Krıma agentligi.
Video qullanıcı Sergey Vladimiroviçke ait.
Rusiye İç İşler Nazirligi, akimiyet qararına bazı deñişmeler kirsetti. Olarğa köre, qırımlı aydavcılar aprel 1 kününe qadar elde etken arabalarnıñ ukrain türlerini rusiye türlerine deñiştirmek kerek.
Ukraina Nazirler Şurasınıñ iş gruppası, aprel 1- nden soñ esasiy Ukraina boyunca rusiye türleri olğan qırım arabalarınıñ areket etüvinen bağlı meselesini çezmekteler.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
