Rusiye nezareti astında bulunğan Aqmescitte, sözde referendumnıñ ekinci yıllığını qayd etmege planlaştıralar. Belli ki, mezkür referendumnıñ neticelerine köre, Qırım yarımadası Rusiye Federatsiyasınıñ terkibine kirgen.
Şeer memuriyetiniñ matbuat hızmeti bildrigeni kibi, mart 16 ve 18 künleri olacaq «bayram tedbirleri» sebebinden, Aqmescitniñ merkezinde bir sıra soqaqlarnıñ yolları qapatılacaq. Bunıñnen bir sırada, bu künleri şeerniñ merkeziy qısmında arabalarnıñ parkovkası yasaq etilecek.
Berilgen malümatlarğa köre, mart 16 künü, saba saat 9:00 Moskva nezareti astında bulunğan Qırım Parlamentine doğru yürüş ötkerilecek. Mart 18 künü yerli akimiyet, Lenin meydanında medeniy - kütleviy tedbirlerni ve kontsertni keçirmege istey.
2014 senesi mart 16 künü Qırımda sözde referendum keçirilgen edi. Onıñ neticesinde Rusiye Qırımnı öz terkibine kirsetti.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
