Link açıqlığı

Mart 14 - 15 künlerine yarımadada furtuna havfı olacağı ilân etildi. Bu aqta Rusiye nezareti astında bulunğan Qırımdaki Fevqulade Vaziyetler Nazirligi bildirmekte.

Etraftaki müit boyunca gidrometeorologiyanıñ ve monitoringniñ Qırım idaresi haber etkenine köre, eki kün devamında küçlü şimal-şarqiy ruzgrânıñ esmesi mümkün.

«Evlerniñ pencerelerini sıqıp qapatmaq, balkon ve lociylerden pekitilmegen eşyalarnı alıp qoymaq, soqaqlarda reklama qalqanları, yol işaretleri levhaları, elektriknen temin etüv ağlarından uzaq olmaq kerek, bunıñnen bir sırada, balaban tereklerniñ yanında turmamaq ve olarnıñ yanlarında arabalarını toqtatmamağa tevsiye etemiz», - dep qayd etti FVN.

Keriç paromlı keçitini idare etken «Morskaya direktsiya» adlı müessiseniñ saytında belgilengeni kibi, keçitniñ çalışması ava vaziyetinden bağlı olacaq.

Mart 12 künü Keriç paromlı keçiti, yüz bergen tuman sebebinden bir saatten ziyade çalışmadı.

Keriç boğazından keçken paromlı keçit,Rusiye Federatsiyasınıñ Krasnodar yerini Qırımnen bağlağan esas naqliyat damarı olaraq sayılmaqta.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG