Ukraina nazirler şurasınıñ iş gruppası, Qırımda aprel 1 kününden soñ, arabasına Rusiye nomerasını alğan adamlarnıñ esasiy Ukraina boyunca kezmek meselesiniñ çezüv yollarını taptı.
Bu aqta, Qırım.Aqiqat agentligine Ukraina Devlet hızmetiniñ Qırım ve Aqyar işleri boyunca reisi Nariman Ustayev bildirdi. Belli ki, bundan evel Ustayev, mezkür iş gruppasınıñ teşkilâtçısı olaraq çıqqan edi.
Onıñ sözlerine binaen, gruppağa profil hızmetleriniñ vekilleri kirmekte, olarnıñ iş neticeleri ise eñ yaqın zamanda Nazirler Şurasınıñ yolbaşçılarına teslim etilecek. Devlet hızmetiniñ yolbaşçısı bildirgenine köre, meseleniñ çezüv yolları endi tapılğan.
«Eger devletniñ vatandaşlarına qarşı yapılacaq siyaseti aqqında söz yürütilse, çezilmeycek meseleler olmamaq kerek. Şimdiki vaqıtta, devlet hızmetinen teklif etilgen mehanizm Nazirler Şurası iş gruppasınıñ vekilleri tarafından muzakere etilmekte. Biz bu mesele üzerinde çalışamız»,- qayd etti Ustayev.
Berilgen malümatlarğa köre, Herson vilâyetiniñ keçme noqtalarında mahsus sistemalar teşkil etilecek. Olarnıñ yardımı ile qırımlı araba saipleri Rusiye araba nomeralarını «mütenasip resmiy şahıslarğa» emanet olaraq teslim etecek, olarnıñ yerine ukrain nomeralarını qoyıp, esasiy Ukraina territoriyasında problemsiz kezecekler. Bu meseleler içün mahsus HUV-nı teşkil etmege planlaştırıla.
«Keçüvniñ nezaret noqtalarında naqliyat VİN- kodınıñ teşkerüvi kerçekleştirilecek. Böyleliknen, Qırım Cumhuriyeti ve Aqyar şeerinden kelgen arabalarnıñ sıñırdan keçüvi, tek ukrain qanunı boyunca qayd etilgen vesiqalarğa köre kerçekleştirile bile»,- dep teklif etildi hızmette.
Rusiye iç işler nazirligi, Rusiye akimiyeti qararına tüzetmeler kirsetti. Olarğa köre, yarımadada ukrain araba nomeraları ile yürgen qırım sakinlerine aprel 1 kününe qadar, mezkür nomerlerni Rusiye qanunına köre deñiştirmek kerek.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
