Devlet kinosı, 2016/17 s.s. milliy filmlerniñ yapıluvı boyunca programmağa kirsetilgen kinoleyhalarnıñ cedvelini tasdıqladı. Cedvelge ukrain rejissörı Ahtem Seytablayevniñ «Kiborgler» adlı yañı leyhası kirgen.
Devlet kinosınıñ resmiy saytında belgilengeni kibi, mezkür bediiy filminiñ büceti 47 mln 947 biñ 200 grivnanı teşkil etmekte. Devlet kinosı bücetinden paranıñ yarısı ayırıla bile.
«Haytarma» filminiñ rejissörı ve baş aktörı Ahtem Seytablayev, yañı leyha üzerinde keçken seneniñ baarinde çalışıp başladı. Belli olğanı kibi, film Donetsk avalimanınıñ qoruyıcılarına bağışlanacaq. Donetsk avalimanını qorçalağan askerler stsenariyniñ yazıluvında yardım etmekteler.
«Bu film yañı memleket, yañı devletniñ mimarları aqqındadır», - dep qayd etti Seytablayev.
Ahtem Seytablayev, 2013 senesi «Haytarma» filmini çıqarıp, anda baş rolni oynadı. «Haytarma» filmi qırımtatarlarnıñ sürgünine bağışlanğan ilk bediiy leyha oldı. Mezkür film, Rusiye kinemotografiyanıñ eñ şerefli «Nika» mukâfatına nail oldı.
2015 senesiniñ iyün ayında «Haytarma» filmi, Rusiyede apis etilgen Öleg Sentsovnıñ yardımına, Berlin şeerinde keçirilgen ukrain kinosı künleri tedbiriniñ çerçivesinde kösterilgen edi.
