Aqyarda, 2014 senesi fevral - mart aylarınıñ vaqialarına bağışlanğan bediiy filminiñ çıqarılması başlandı. Moskva nezareti astında bulunğan Aqyar akimiyetiniñ matbuat hızmeti bildirgenine köre, bu sebepten, şeerniñ naqliye areketi 12,15,16,18, ve 19 mart künleri devamında sıñırlı olacaq.
Mesacda haber etilgeni kibi, «2014 senesiniñ Qırım baari» adlı filminiñ üzerinde çalışmalar başlağanı sebebinden, şeerdeki er bir naqliyatnıñ areketi 5 künge sıñırlanacaq.
Filmniñ çıqaruvı Aqyar şeerinde ve Balıqlavada kerçekleştirilecek.
2014 senesiniñ mart ayında olıp keçken vaqialarnı «Qırım baari» ya da «rus baari» dep adlandırdılar. O vaqıt yarımadada sözde referendum keçirildi, neticede ise Qırımnı Rusiye terkibine kirsettiler.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
