Link açıqlığı

Ukrainada Qırım sakinleri içün doğuv ya da ölüm qayd etilüvi boyunca hatırlatuv talimatını neşir ettiler


İnsanlarnıñ aq-uquqları boyunca ukrain Helsinki gruppası işğal etilgen yerlerde olıp keçken doğum ya da ölüm aqqında şeedetnamelerni almaq içün resimli talimat çıqardı.

Bu aqta, mart 11 künü, Feysbuk saifesinde qırımtatar halqınıñ işleri boyunca Ukraina prezidentiniñ vekili Mustafa Cemilevniñ matbuat hızmeti bildirdi.

Ukraina adliye naziriniñ muavini Sergey Petuhovnıñ sözlerine binaen, «mezkür protsedura amelde çalışıp, kerekli şeadetnamelerni qısqa müddet içinde elde etmege yardım ete».

Ukraina Parlamenti ekinci oturışında 249 deputatlarnıñ reyleri ile №3171 qanun qabul etildi. Oña köre, grajdanlıq - protsessual qanunnamesine işğal etilgen yerlerde, Qırım, Donetsk regionları ve Lugansk vilâyetlerinde doğum ya da ölüm faktlarnıñ belgilenmesi boyunca deñişmeler kirsetilgen.

Mezkür vesiqa Ukraina adliye Nazirligi tarafından işlep çıqarılğan. Hızmette emin etkenleri kibi, Ukraina nezaretinde bulunmağan yerlerde yaşağan ukraina vatandaşlarına ukrain vesiqalarnı tez sürette almaq içün bu talimat yardım etecek.

Ukraina Yuqarı Şurası, 2014 senesiniñ fevral 20 resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imzaladı. Halqara teşkilâtlar Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG