Ğarp sanktsiyaları sebebinden, Qırımda yabancı müessiseler resmiy şekilde kirmege qorqqanları içün, Rusiye Federatsiyası yarımadada mahsus uquqiy teşkilâtnı açmaq niyetinde. Bu aqta mart 11 künü Rusiye nezareti astında bulunğan Qırım akimiyetiniñ yolbaşçısı Sergey Aksönov bildirdi.
«Kirüv tehnologiyası Rusiye qıtalı qısımında yuridik teşkilâtnıñ teşkil etilmesini farz ete, o ise, ileride mında ecnebiy tessisçilerniñ faaliyetini alıp baracaq», - dep ayttı Aksönov.
Tavsilâtlı malümatlarnı o, «leyhağa zarar ketirmemek içün» açıqlamadı.
Aksönovnıñ sözlerine binaen, ecnebiy adamlar Qırımnen endi çalışmaqta. «Aslında, Qırım yarımadasında ecnebiy paralar endi bar», - dep bildirdi Rusiye Qırım yolbaşçısı.
Rusiye nezareti astında bulunğan Qırım akimiyetiniñ iqtisat naziri Valentin Demidovnıñ qaydlarına köre, yatırımcılar topraq ve mülkni bazarlıqsız kirağa ala bilecekler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
