Makemeci Galina Redko Çiygoznıñ apiste qalması boyunca qararnı eki kere qanunsız şekilde çıqarğan. Olarnıñ birinde qapatıluv müddeti belgilenmey edi, haber etti öz Twitterinde mart 11 künü Ahtem Çiygoznıñ advokatı Nikolay Polozov.
Onıñ sözlerine binaen, bu sebepten makemecige ekinci çıqarma yazıldı.
«Makemeciler öz toplaşuv odasında oturğan vaqıtta, makemeci Redko eki kere apiste bulunuv müddetini qanunsız şekilde çıqarğanı aqqında belli oldı. 04.03.16 s. alınğan ekinci qararda Redko qapatıluv müddetini iç te belgilemedi, yani «müddetsiz» kibi keçti», - dep yazdı Polozov.
Şimdiki vaqıtta Polozovnıñ sözlerine makemeci Redko iç bir izaat bermedi.
Qırımda Rusiye nezareti astında bulunğan Yuqarı Makemede «fevral 26» işi boyunca makeme oturışı başlandı. Onıñ çerçivesinde Ahtem Çiygoz, Ali Asanov ve Mustafa Degermenciniñ ceza vaqıtınıñ uzatuvı baqılacaq.
Nikolay Polozov - Ahtem Çiygoznıñ rusiye advokatı, makemeci Galina Redkonı bu işten çıqarması boyunca muracaat yazdı. Onıñ sözlerine binaen, Makemeci Redkoğa çıqarıluv bildirmeleriniñ biri - ekinci grajdanlıq ve Ukrainada makemeci statusına nail olğanıdır. Bunıñnen bir sırada, advokatnıñ sözlerine binaen, «Prokuror makemeciniñ çıqarıluvına qarşı çıqtı. Makemeciler toplaşuv odasına kettiler».
Evel haber etilgeni kibi, mart 11 kününe belgilengen makeme oturışı bir saatke qozğalandı.
Bundan evel Rusiye advokatı Nikolay Polozov Rusiye Baş prokuraturasına Çiygoznıñ Aqmescit SİZOsında qanunsız tutılması boyunca muracaat yazdı. Delil olaraq, yanvar 25 künü Qırım Yuqarı Makemesinen çıqarılğan qararına köre, Ahtem Çiygoz ve «fevral 26» işiniñ başqa faaleriniñ apiste tutılması müddeti mart 9 künü 00:00 saatte bitkenini ketirdi.
Öz arizasında advokat Çiygoznıñ аpis etüv vaqıtını üç künge uzatqan Kreml nezareti astında bulunğan Qırım Yuqarı Makeme makemecisi Galina Redkonı mesülietke çekmege talap etti.
Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
