Turkiyede iş ziyareti ile bulunğan Ukraina prezidenti Petro Poroşenko, Turkiye Cumhuriyetiniñ prezidenti Recep Tayip Erdoğannen eki memleketniñ strategik işbirligi aqqında umumiy deklaratsiyanı imzaladılar.
Belgilengen vazifeler arasında: «Qırımnı qaytarmaq içün halqara uquqnıñ çerçivesinde beraber çalışmaq, OON, ÖBSE, Avropa Şurası çerçivesinde Ukraina mustaqilligini yarımadağa tarqatıp qaytarmaq, Ukraina vatandaşlarınıñ, daa çoq işğal etilgen yerlerde yaşağan qırımtatarlarnıñ uquqları qorumasını kerçekleştirmek kibi meseleler muzakere etilgen».
Bunıñnen bir sırada, «mudafaa ve telükesizlik saasında Turkiye Cumhuriyeti ve Ukraina arasında añlaşma baza ve işbirlikniñ koordinatsiyasını quvetleştirmek», «halqara telükesizlik ve tınçlıqnen temin etmek içün, OON telükesizlik şurasınıñ deñişme meselelerinde daa teren işbirlikni kerçekleştirmek», «Qara deñizniñ regional telükesizlik mehanizmlerniñ pekitmesinde yardımcı olmaq» ya da «NATO ve halqara telükesizlik yönelişiniñ temin etilüvi çerçivesinde umumiy ğayrette işbirlikni quvetlendirmek» kibi meseleler baqıldı.
İqtisadiy işbirligi çerçivesinde serbest ticaret añlaşmasınen bağlı muzakereler, yatırımnıñ qarşılıqlı qoruması ve bergi mecburiyetiniñ ekilemesinden çetleşüvi, tabiy gaznıñ temin etilüvi boyunca eki devletniñ umumiy tedbirlerniñ keçirilmesi, mında Ukraina gaz naqliyat infrastrukturasınıñ qullanması ve Hazar havzasından Avropağa tabiy gaznıñ teslim etilmesi boyunca leyhalarğa başqa memleketlerniñ umumiy celp etilmesi kibi iqtisadiy meseleler qoyulğan.
Petro Poroşenko Turkiyede eki künlük iş ziyareti ile bulunıp, memleket akimiyetinen körüşüvlerni keçiрди.
Ukraina ve Turkiye arasında munasebetler soñki bir qaç ay devamında faalleşti. Rusiyenen olğan zıddiyetten soñra, Turkiye halqara cemaatçılığınıñ Ukraina territorial bütünliginen, Rusiye tarafından yarımadanı işğal etkeninen bağlı mevamını qabul etip, kendi noqta - i nazarını seslendirdi. Bunıñnen bir sırada Turkiye qırımtatarlarnen sıq bağlıdır, olarnıñ ekseriyeti Turkiye Cumhuriyetinde yaşamaqta.
