Qırımtatarlarnıñ milliy lideri Mustafa Cemilev bildirgenine köre, Turkiye Ukraina ile iqtisadiy ve arbiy ceetten yaqınlaşmağa istey, onıñ fikirince, bu Qırımnıñ qaytarılmasına yardım eter.
Bu aqta Qırım.Aqiqat saytına, Cemilev, Ukraina ve Turkiye prezidentleri Petro Poroşenko ve Recep Tayip Erdoğannıñ körüşüvlerini izaatlağanda haber etti.
«Şimdi Ukrainanen iqtisadiy ve arbiy yaqınlaşmasına yol alındı. Turkiye daima kendi milliy iqtisadiy faydasına köre areket etkenine baqmadan, bizim noqta-i nazarımızğa köre, şimdi bu eyi tarafqa deñişkendir. Elbette, bizim içün ve Qırım qaytaruvı boyunca faaliyeti içün de faydalı olur», - dep ayttı Cemilev.
Petro Poroşenko Turkiyede eki künlük iş ziyareti ile bulunıp, memleket akimiyetinen körüşüvlerni keçirmekte. Çarşenbe künü Poroşenko ve Turkiye prezidenti Recep Tayip Erdoğan, eki devletniñ strategik işbirligi aqqında umumiy deklaratsiyasını imzaladılar.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
