Moskva nezareti astında bulunğan Qırım akimiyeti yarımadada elektrikniñ söndürülmesi devam etkeni aqqında haber ete.
Bunıñnen bir sırada qurulğan Kuban-Qırım energo köprüniñ yardımı ile elektrik energiyasınıñ umumiy generatsiyası 850 MVt artqanını qayd eteler.
«Qırımnıñ kendi elektrik energiya generatsiyası 436 MVt teşkil ete, energo köpür ise yarımadağa elektrikni 414 MVt temin ete. Bunıñnen bir sırada, Qırımda tolusınen yarıq olmağan rayonlar qayd etilmegen. Elektrikniñ söndürilmesi münitsipal teşkilâtlarnıñ ayırğan limitleri boyunca kerçekleştirilmekte»,- qayd etile qırım akimiyetiniñ matbuat hızmetinde.
Qırımda 2015 senesiniñ noyabr 22 kününden başlap Ukrainadan elektrik berilmesiniñ toqtatılması sebebinden Fevqulade Vaziyet kirsetilgen. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüri yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
