Link açıqlığı

Kremlnen tayin etilgen Aqyar şeeriniñ gübernatorı Sergey Menâylonıñ fikirince, Turkiye Qırımnı Ukrainağa qaytarmaq içün, yarımadanı Rusiyeden alamaz.

Aqyarnıñ rus gübernatorı Ukraina prezidentiniñ Turkiyege iş ziyaretini böyle izaatladı. Belli olğanı kibi, körüşüv devamında Ukraina ve Turkiye Ukraina bütünligini ğayrıdan qaytarmaq içün, halqara teşkilâtlarnıñ çerçivesinde, işbirlik aqqında söz yürüttiler.

«Petro Poroşenko Turkiye prezidentinden Qırımnı qaytarmaq içün yardım soradı...Eger ukrain yolbaşçısı onıñ içün oppadaqtan Qırımnı alacaqlar, dep tüşünse, turkiye ordusında kamikadze yoqtır. 2 million rus vatandaşları yaşağan, tolusınen silâlanğan arbiy gruppirovka yerleşken yarımadanı zapt etmek - eñ azı yahşı fikir degil, blitskrig olmaz. Belki de sözde ukrain delegatsiyasına bir şeyler vade etkendirler ve atta 'kölgenen tutuşuv' keçirdiler, amma bunıñnen iş bitmez»,- dep yazdı Feysbuk saifesinde Menâylo.

Petro Poroşenko Turkiyede eki künlük iş ziyareti ile bulunıp, memleket akimiyetinen körüşüvlerni keçirmekte. Çarşenbe künü Poroşenko ve Turkiye prezidenti Recep Tayip Erdoğan, eki devletniñ strategik işbirligi aqqında umumiy deklaratsiyasını imzaladılar.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG