Link açıqlığı

Qırımtatar rejissörı ve aktörı Ahtem Seytablayevniñ fikirince, Rusiye tarafından işğal etilgen Qırımnıñ Ukraina terkibine qaytarılmasında ukrain halqı esas rolni oynacaq. Bu aqta Seytablayev mart 10 künü Kiyev şeerindeki ukrain krizis media-merkezinde ötkerilgen brifing devamında bildirdi, haber ete Qırım.Aqiqat.

«Qırım qaytarılmasınıñ yekâne ve esas faktor - bu ukrain halqı. O ise, qırımtatarlarğa daima destek köstergen ve bütün deñişmelerniñ, olarnıñ arasında memleketimizde olıp keçken qıymet degerliklerniñ hedlayneri olmaqta»,- dep ayttı Ahtem Seytablayev.

Onıñ sözlerine binaen, ukrain cemiyetinde Qırımnıñ qaytarılması on yıllıq devamıda üküm süre bilecek protsessi sözlerini eşitmege pek ağır.

«Öz kederimnen paylaşmaq isteyim. Men ana-babası, biñlerce soy-aqrabası, eki balası Qırımda yaşağan bir qırımtatarım... Qırım 50 seneden soñ qaytarılacağınen bağlı sözler,- sizge bunıñnen içimde peyda olğan bütün duyğularım aqqında aytmacam»,- dep ayttı o.

«Men realistim. Elbette, men yarın saba uyanğanımnen Qırım Ukrainağa qaytqanı aqqında eşitmek ister edim. Böyle olmaycağını añlayım. Amma bu yol pek uzun olğanını akis etken fikirlerni de iç qabul etmem»,- dep qoştı qırımtatar rejissörı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG