Rusiye nezaret astında bulunğan Qırım iç işler, malümat ve alâqa nazirligi mart 10 künü yarımada işğal etilgen zamannıñ vaqialarına bağışlanğan saytnı işletip başladı. Portal «Qırım baari» serlevasını taşıy, haber ete Qırım.Aqiqat
«Mında siz 2014 senesiniñ fevral - mart ayları devamında yüz bergen Qırım ve bütün Rusiye içün al etici kerçek ve obyektiv malümatlarnı tapa bilesiñiz. Bizim internet portalımız sizni mevzu boyunca fotoresim, video levhalar ve «qırım baari» şaatları ve iştirakçilerniñ izaatlarınen tanış eter»,- dep aytıla saytta.
«Hronika» bölüginde 2014 senesiniñ fevral - mart ayı devamında olıp keçken vaqialarnıñ tarifi, anda fotoresimler yerleştirilgen.
«Malümat» bölüginde qırımlılar tarafından yapılğan bütün fotoresimler berilmekte.
Fotoreportajlar keçken sene, «Seniñ qırım baariñ» adlı sergide taqdim etilgen edi.
«Tedbirler» bölüginde Qırım işğaliniñ ekinci yıllıq munasebetine bağışlanğan olacaq merasimler aqqında tarif etile.
Bunıñnen bir sırada «Viktorina» adlı bölük te öz yerini taptı. Onı mart 4 - 31 qadar «Krımtelekom» müessisesi keçirmekte. Ğalebe qazanğan cep ağı hızmetine aktsion bağlav sertifikatına nail olacaq.
«Qırım baari» ya da «rus baari» 2014 senesi mart ayınıñ vaqialarıdır. O vaqıt Qırımda sözde referendum keçirilgen edi, onıñ neticesine köre ise, Qırım Rusiye Federatsiyasınıñ terkibine kirgen.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
