Link açıqlığı

Ukrain Nadejda Savçenkonıñ advokatı Mark Feygin bildirgenine köre, o, quru açlıqnı toqtatqanı aqqında ilân etti.

«Nadâdan kelem. O, Petro Poroşenko ve vetandaşlarnıñ ricası ile açlıqnı toqtattı», dep yazdı Twitterde advokat.

Mart 9 künü Rusiye Rostov vilâyetiniñ Donetsk şeer makemesi ilân etkeni kibi, Savçenkonen bağlı makeme ükmü mart 21-22 künleri çıqarılacaq. Mart 4 künü açlıqnı başlağan ukrain qadınnıñ sağlıq vaziyeti kerginleşti, amma o, mart 9 künü ötkerilgen oturuşta iştirak etip, kene öz qabaatsızılğı aqqında aytmağa küç taptı. Savçenko onı azat etilmesi talabınen dekabr ayından başlap açlıqnı tutmaqta.

Nadejda Savçenko - Ukraina halq deputatı, Avropa Şurası parlament assambleyasınıñ Yuqarı Şura delegatı, Rusiyeniñ apisinde 2014 senesi yapılğan cinaiy iş boyunca bulunmaqta. Savçenkonı Ukrainada qanunsız bulunğan, rusiye devlet televideniyesınıñ eki hadiminiñ öldürmesinde, separatist gruppasınıñ suiqast öldürmesinde ve qanunsız Rusiye sıñırını keçmesinde qabaatlaylar. Rus prokurorları ukrain qadınnı 23 yılğa apiske atmağa talap eteler.

Nadejda Savçenko ve onıñ menfaatını qoruğan advokatlar makemege rus jurnalisterniñ elâk olğan vaqıtqa Savçenko separatistlerniñ esirinde bulunğanı, soñra ise isteksiz Rusiyege alıp çıqarılğanı aqqında bir çoq dalil ketirdiler. Amma makeme bu dalillerni qabul etmedi.

Bir sıra halqara cemaat teşkilâtlarnıñ liderleri Rusiyege Savçenkonıñ azat etilmesinen bağlı muracaatlar yolladı. Oña destek kösterüv aktsiyaları çetel ve Ukrainanıñ bir sıra şeerlerinde ötkerildi.

Mart 9 künü Ukraina prezidenti Petro Poroşenko Nadejda Savçenko Ukrainağa sağ ve sağlam qaytması içün er şey yapacağı aqqında ilân etti.

XS
SM
MD
LG