Link açıqlığı

Poroşenko ve Erdogan Rusiye tarafından Qırımnı arbiy bazağa çevirmesi maqbül olmağan bir şey olaraq sayalar


Ukraina ve Turkiye, Qara deñiz regionnıñ eki devlet prezidentleri Rusiye tarafından işğal etilgen Qırım yarımadasını kendi orduları içün arbiy bazağa çevirgenine qarşı çıqtılar. Bu aqta Ukraina prezidenti Petro Poroşenko çarşenbe künü, Ankara şeerinde Turkiye prezidenti Recep Tayip Erdoğannen körüşüv çerçivesinde keçirilgen matbuat konferentsiyasında bildirdi, qayd ete «İnterfaks-Ukraina».

«Biz Qırımda yüz bergen vaziyetini tavsilâtlı şekilde muzakere ettik. Bizim fikirimizce, vaqtınca işğal etilgen yarımadanı arbiy bazağa çevirmege maqbül degildir», - dep ayttı Poroşenko.

9 mart, çarşenbe künü, Ukraina prezidenti Pötr Poroşenkonıñ Turkiye Cumhuriyetine planlaştırılğan eki künlük resmiy ziyareti başlandı. Qırımtatarlarnıñ işleri boyunca Ukraina prezidentiniñ vekili Mustafa Cemilev ve milliy Meclis yolbaşçısı Refat Çubarov Petro Poroşenkonıñ başlığında ukrain delegatsiyasınıñ terkibi ile beraber Turkiyede keçirilgen muzakerelerde iştirak etmekteler.

Ukraina ve Turkiye arasında munasebetler soñki bir qaç ay devamında faalleşti. Rusiyenen olğan zıddiyetten soñra, Turkiye halqara cemaatçılığınıñ Ukraina territorial bütünliginen, Rusiye tarafından yarımadanı işğal etkeninen bağlı mevamını qabul etip, kendi noqta - i nazarnı seslendirdi. Bunıñnen bir sırada Turkiye qırımtatarlarnen sıq bağlıdır, olarnıñ ekseriyeti Turkiye Cumhuriyetinde yaşamaqta.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG