Qırımtatar milliy Meclisi yolbaşçısı Refat Çubarovnıñ teşebbüsi ile teşkil etilgen «Çiygoz cedveli» boyunca iş, qırımtatarlar sürgün etilmesiniñ 72 yıllığına, mayıs 18 yekünlenecek. Bu aqta Qırım.Aqiqatqa Meclis azası Eskender Bariyev bildirdi.
Onıñ sözlerine binaen, cedvelge tek «26 fevralniñ işi boyunca» «repressiyalarnıñ icracıları» degil de, Qırımda ukrain vatandaşlarına qarşı qanunsız areketlerini yapqan bütün adamlar kirecek.
«Çiygoz ve onıñ işi Ukraina topraq bütünligi küreşinde bir timsal olğan. Faqat cedvelniñ özü Qırım akimiyeti tarafından yapılğan bütün aq qoruma bozuvlarını qaplap almaq kerek. Bu repressiyalarğa oğrağan bütün qırımlılarnıñ umumiy cedvelidir», - dep ayttı o.
Meclisniñ ümütlerine köre, avropa ve amerika akimiyetlerine bu cedvelniñ teslim etilüvi Halqara qırımtatarlar kongresi ve ukrain diplomatik hızmetleri tarafından kerçekleştirilecek.
«Bugünki künde qırımlılarğa nisbetten qanunsız areketlerni ömürge keçirgen insanlarğa qarşı şahsiy sanktsiyalarnı kirsetmege mümkün. Bu ilk - evelâ bizim faalligimiznen bağlı. «Çiygoz cedveline» biz tek Qırım işğal etici akimiyetini degil de, repressiyalarğa alâqası olğan Kreml vekilleri, qırımtatarlar ve ukrain faallerine qarşı yalan sözlerini aytqan adamlarnı da kirsetecekmiz», - haber etti Bariyev.
«Çiygoz cedveli» mart 9 künü qırımtatar milliy Meclisiniñ yolbaşçısı Refat Çubarovnıñ teşebbüsi ile peyda oldı.
Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
