Link açıqlığı

Poroşenko Turkiye prezidenti ile olacaq muzakerelerde qırımtatarlarnıñ aq-uquqları aqqında söz yürütecek


Ukraina prezidenti Petro Poroşenko bildirgeni kibi, Turkiye akimiyeti ile olacaq muzakereler devamında esas mevzulardan biri qırımtatarlarnıñ aq-uquq qoruması ve Rusiyenen işğal etilgen yarımadanıñ Ukraina terkibine qaytarılması boyunca umumiy areketlerniñ koordinatsiyası olacaqtır.

«Bugünki künde Qırımda yüz bergen insanlar uquqlarnıñ bozulması mümkün degil», - dep izaatlay Turkiyede eki künlük resmiy ziyareti ile bulunğan Poroşenkonı mutbuat hızmeti.

Devlet yolbaşçısı mustaqillik qoruma meselesinde qırımtatarlar qattı noqta-i nazarda turğanları, Rusiye tarafından yapılğan işğalni qabul etmegenleri içün bütün halqqa minetdarlıqnı bildirdi.

Prezidentniñ qayd etkenine köre, Ukraina ve Turkiye arasında munasebetler şimdi «pek yüksek seviyede». Belli olğanı kibi, Turkiyeniñ akimiyeti ile körüşüv devamında umumiy telükesizlik, Qara deñiz regionınıñ telükesizligi, iqtisadiy işbirlik ve içtimaiy qoruma kibi meseleler baqılacaq.

«Turkiye Cumhuriyeti Ukraina mustaqilligi meselesinde daimiy ve qattı destek köstergeni içün, oña minetdarlığımıznı bildiremiz», -dep qoştı prezident.

Halqara cemaatçılıq, olarnıñ arasında Avropa parlamenti, Rusiye tarafından işğal etilgen Qırımda yüz bergen insan aq-uquqlarnıñ bozulması aqqında defalarca bildirip, Moskva akimiyetini bozuvlarnı toqtatmağa çağırdılar.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG