Link açıqlığı

Poroşenko Turkiyeniñ parlamentini qırımtatarlarnıñ sürgün etilmesini genotsid olaraq tanımağa çağırdı - Tsegolko


Ukraina prezidenti Petro Poroşenko, Ankara şeerinde resmiy ziyaretinen bulunır eken, Turkiye parlamentini 1944 senesi qırımtatarlarğa qarşı yapılğan sürgünni genotsid olaraq tanımağa çağırdı.

Bu aqta Poroşenkonıñ matbuat kâtibi Svâtoslav Tsegolko bildirdi.

Onıñ qayd etkenine köre, bunıñnen bir sırada, Ukraina ve Turkiye Rusiye tarafından işğal etilgen Qırımdaki qırımtatarlarnıñ qoruması boyunca ğayretlerini faalleştirecekler.

Ukraina prezidenti Petro Poroşenko mart 9 künü resmiy ziyareti ile Turkiye Cumhuriyetinde bulunmaqta. Ankarağa teşrif buyurğan ukrain delegatsiyasınıñ terkibine qırımtatarlarnıñ liderleri Mustafa Cemilev ve Refat Çubarov kirgenler.

Ukraina ve Turkiye arasında munasebetler soñki bir qaç ay devamında faalleşti. Rusiyenen olğan zıddiyetten soñra, Turkiye halqara cemaatçılığınıñ Ukraina territorial bütünliginen, Rusiye tarafından yarımadanı işğal etkeninen bağlı mevamını qabul etip, kendi noqta - i nazarnı seslendirdi. Bunıñnen bir sırada Turkiye qırımtatarlarnen sıq bağlıdır, olarnıñ ekseriyeti Turkiye Cumhuriyetinde yaşamaqta.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG