Link açıqlığı

Qırımtatar milliy Meclisi yolbaşçısı Refat Çubarov "Çiygoz cedveli" şekillendirüvi başlaması aqqında haber etti. Bu cedvelge qırımtatarlar ve ukrainlerge qarşı yapılğan siyasiy taqipler içün mesül şahıslarnıñ isimleri kirecek.

Bu aqta o, mart 9 künü, Feysbuk saifesinde bildirdi.

«Çiygoz cedveli»ni tizmege başlaymız. Cedvelge qırımtatarlar ve ukrainlerge qarşı yapılğan siyasiy taqipler, apishanede tutılmalar ve başqa repressiyalar içün mesül şahıslarnıñ isimleri kirecek. Mında ve maña şahsiy mesaclarda yaza bilesiñiz. Belgilenecek şahısnıñ adı, soyadı, baba adı, vazifesi ve qısqa esaslav mıtlaq olmaq kerek... », - dep qayd etti Meclis yolbaşçısı.

Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında bulunğan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG