Mart 8 künü «Kalançak» keçirme noqtasında politsiya hadimi «Qırım grajdanlıq blokadası»nıñ iştirakçisini attı. Bu aqta Herson vilâyetiniñ Milliy politsiya bölüginiñ matbuat hızmeti bildirmekte.
«Polis Kalançak rayonında olıp keçken atış boyunca teşkerüv tedbirlerni keçirmekte. «Herson» rotasınıñ hadimleri yaş erkekniñ tarafından yapılğan qanunsız areketlerini toqtatmaq içün, onı tenbiyelegen soñ, ateş açmağa mecbur qaldılar. Erkek ise politsiya hadimini silânen qorquta edi. Yaralanğan yigitni hastahanege yolladılar, silâsını tutıp aldılar. Cinaiy iş açılğan. Bunıñnen bir sırada yüz bergen vaqia boyunca taqiqat yapılmaqta», - dep bildirdiler matbuat hızmette.
Berilgen malümatlarğa köre, mart 7-8 gecesi bir qadında «Qırım grajdanlıq blokadası»nıñ iştirakçısı ile tartışma yüz berdi, onıñ neticesinde qadın polis hadimlerini çağırdı. Taqiq vaqıtta faallerden biri «Herson» rotasınıñ polis hadimni silânen qorqutıp başladı.
Matbuat hızmetiniñ qaydlarına köre, polis hadimi ilk evelâ avağa, soñra ise «grajdanlıq blokadası» iştirakçisiniñ sağ ayağına attı.
Politsiyanıñ malümatlarına binaen, yigitni Kalançak rayon hastahanesine teslim ettiler. Sağlıq vaziyeti qanaatlendiricidir.
Vaqia yüz bergen yerden silâ alınıp, ekspertizağa yollanıldı. Kalançak politsiya bölügi Ukraina qanunnamesiniñ «Qanunsız silâ, patlağan maddeler qullanması» nıñ 263 maddesine köre cinaiy iş açtı.
