Aqmescit suv anbarı 2016 senesi mart ayınıñ başına 80 faizğa suvnen toludır, dep bildirdiler Aqmescit gidroağnıñ işçileri.
Olarnıñ sözlerine binaen, sebebi kelişken ava şaraitlerindedir. Suv anbarnıñ bütün acimı 36 mln kubometrni teşkil ete, bent yanındaki maksimal terenlik - 36 metr.
Aqmescit suv anbarı 1956 senesi qurulğan, esas vazifesi olaraq köy hocalığı içün suv teminlenmesi ve aqmescitliler içün raatlıq yeriniñ olması belgilengen edi. Amma 60 - ncı seneleri içilgen suvğa ihtiyac arttı, bundan sebep, suv anbarını Aqmescitni suvnen temin etmek içün qullanıp başladılar. Suv qoruma rejimi kirsetilgen soñ, etrafta yerleşken raatlıq obyektlerini qapattılar.
Suv anbarı qorumasını quvetleştirmek içün Qırım akimiyeti «opolçeniye» küçlerini celp etti. Bu teşkilâtnıñ vekilleri yerli sakinlerge balıq tutmaq, yuvunmaq kibi şeylerni yasaq etip, yerni patrul eteler. Bunıñnen bir sırada olar suv anbarınıñ tek kiçkene qısmını nezaret astında tutalar. Qalğan qısım ise qorumasız qalmaqta.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
