«Memleket sesi» adlı şounıñ iştirakçisi Eskender İslâmov öz Red Sneakers adlı gruppasınen beraber Camalanıñ «1944»adlı yırınıñ kaver - versiyasını icra etti. Taqım eserge yapılğan klipni Feysbuknıñ saifesinde yerleştirdi.
«Camala, bizge pek açuvlanma, biz seni pek sevemiz! Seniñ acayip yırıñnı o qadar sevdik ki, kaver - versiyasını yapmağa istedik», - dep yazdılar Red Sneakers - niñ iştirakçileri.
Eskender İslâmov, 34 yaşındaki muzıkant, 7 yıl qırımtatar teatriniñ aktörı edi, Qırımdan 2014 senesi fevral ayında ketti ve şimdiki vaqıtta Lvov şeerinde yaşamaqta. Мart 6 künü «Memleket sesi» yarışınıñ altıncı sezonında, soqur diñleme etapında «Too Close» yırını icra etip, muvafaqiyetni qazandı. İslâmov yarışnıñ nevbetteki turına keçti, anda ise onıñ ocası belli ukrain yırcısı Svâtoslav Vakarçuk olacaq.
Bu sene «Yevrovideniye - 2016» yırlar yarışında Ukrainanı qırımtatar yırcısı Camala taqdim etecek. O, qırımtatar halqına qarşı yapılğan stalin rejiminiñ repressiyalarına bağışlanğan «1944» adlı türküni icra etecek.
