8 mart sabası Keriç keçitiniñ işi toqtatıldı, faqat bir saatten soñ naqliye areketi ğayrıdan çalışıp başladı. Bu aqta Fevqulade Vaziyetler Hızmeti bildirdi.
Saba 6:34, hızmetiniñ saytında tuman sebebinden keçit çalışması toqtatılğanı aqqında malümat peyda oldı. Arabacılarğa ava tüzetilmegenine qadar keçitten keçmemege tevsiye ettiler.
Amma saat 7:36 Fevqulade vaziyetler hızmetinde keçit ğayrıdan çalışıp başlağanı aqqında bildirdiler.
Keriç boğazındaki paromlı keçit 2014 senesi Rusiye tarafından işğal etilgen Qırımnı Krasnodar bölgesinen bağlağan esas naqliyat damarı olmaqta.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
