Link açıqlığı

Suriyeli qaçaqlarnıñ Avropağa aqını toqtatmaq içün, Ankara Avropa Birligini 2018 senesine qadar migratsion meselesinen bağlı maliye yardımını eki qat arttırmağa, Turkiyeniñ Avropa Birligine kirmesinen bağlı muzakerelerni tezleştermege ve onıñ grajdanları içün vizalı rejimini lâğu etmege çağıra, dep bildire Azatlıq Radiosı.

Brüssel muzakerelerinde iştirak etken, diplomatlar arasındaki menbalar haber etkenleri kibi, toplaşuvda qoşma üç milliard yevro aqqında söz yürütile.

«Turkiye Avropa Birliginen işbirlik tutmağa, Avropa Birliginiñ azası olmağa azır. Ümüt etem, şimdiki sammit muvafaqiyetli olur ve aramızdaki munasebetler deñişmesine ketirir», - dep ayttı Brüsseldeki AB - Turkiye acele sammiti devamında Turkiye baş naziri Ahmet Davutoglu.

Onıñ qayd etkenine köre, Turkiye Avropağa qaçqan ve anda sığınaq tapamağan işçi migrantlarnı qabul etmege azır.

Mart 7 künü Brüsselde Avropa Birliginiñ liderleri Turkiyeniñ baş - naziri Ahmet Davutoglunen acele sammitni keçirdiler. Esas mevzu - qaçaqlar krizisiniñ yoq etilmesinen bağlı areketler oldı.

XS
SM
MD
LG