Link açıqlığı

Saatnıñ esas haberi

Aqmescitteki Milliy Meclis binasına ucum etildi – Bariyev


Aqmescitte yerleşken qırımtatar milliy Meclisi binası belgisiz şahıslarnıñ tarafından ucum etilgen, bu aqta qırımtatar uquq qoruma komitetiniñ koordinatorı, meclis azası Eskender Bariyev öz feysbuk saifesinde bildirdi.

«Aqmescit Çehov soqağı 20 adresi boyunca yerleşken Aqmescit regional Meclisi binasında camnı qırdılar. Qırımtatar halqı ve Mecliske qarşı aktsiyalar devam etmekte. Umumiy olaraq em yaramazlıq, em böyle deyik «uquq qoruyıcı» ve «makeme» areketleri yüz bermekte», – dep yazdı Bariyev.

Onıñ qayd etkenine köre, ucumnıñ yapılğan vaqıtı belli degil.

Kreml nezaret astında bulunğan Qırım politsiyasınıñ saytında bu adise aqqında malümat yoq.

Qırımda qırımtatar milliy Meclisniñ qapatılmasınen bağlı makeme işi devam etmekte. Bu sebepten halqara uquq qoruyıcı teşkilâtlar qırımtatarlarnıñ kütleviy şekilde quvğunlıqqa oğramasından qorqalar.

OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı.

Rusiye nezaret astında bulunğan Qırım prokuraturası mart 3 künü keçirilgen makeme oturuşında «delil» olaraq 630 saife ve 10 disk malümat teslim etti. Meclis menfaatını qoruğanlarğa vesiqalarnen tanış olmaq içün 7 kün berildi.

Makemeniñ yañı oturışı mart 10 kününe belgilengen.

Qırım uquq qoruyıcı gruppası halqara teşkilâtlarğa Qırımdaki Milliy Meclisniñ qapatılmasına izin bermemek arizası ile muracaatta bulundılar. Mezkür arizada uquq qoruyıcılar halqara teşkilâtlarnı qırımtatarlarğa ve Milliy Mecliske qarşı yapılğan siyaset sebebinden taqip etilmesine yol bermemek ve mümkün olğanı qadar buña tesir etmege çağıralar.

Avropa birligi qırımtatar milliy meclisniñ qapatılmasınen bağlı öz raatsızlıqnı endi bildirdi.

2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov ve Mustafa Cemilevge yarımadağa 5 yıl devamında kirmege yasaq ettiler.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG