Mart 16 künü halqara cemiyeti tarafından tanılmağan referendumnıñ 2 yıllıq munasebetinen, Rusiye nezaret astında bulunğan Qırım Yuqarı Şurasınıñ binasında müzeyniñ açılması planlaştırıla. Bu aqta RİA Krım bildirmekte.
Baş eksponatlarnıñ biri, Rusiye zapt etici ordularnıñ istilâsından soñ, binanıñ üstüne asılğan Rusiye Federatsiyasınıñ bayrağı olacaq.
Ekinci eksponat - Rusiye nezaret astında bulunğan Qırım nazirler şurasınıñ binasına 2014 senesi fevral 27 künü köterilgen rusiye bayrağı olacaq.
«2014 senesi fevral 27 künü Qırım Cumhuriyeti Nazirler Şurasınıñ binası töpesine köterilgen bayraq şimdiki vaqıtta Qırım Nazirler Şurasınıñ Apparatında yerleşmekte. Şübesiz, bu bayraq bizim içün tarihiy timsaldir, bu Qırımnıñ ilk rus bayrağıdır», - dep maqtandılar nazirler şurasında.
2014 senesiniñ fevral ayında silâlı adamlar, olarnı «yeşil adamçıqlar» dep adlandırdılar, Qırım Muhtar Cumhuriyetiniñ devlet müessiselerini zapt ettip, binalar töpesine rusiye bayrağını astılar. Bunıñnen bir sırada «yeşil adamçıqlar», olarğa daa «nezaketli adamlar» dep aytalar, ukrain arbiy qısımlarını tosmenge tuttılar.
2014 senesiniñ mart 16 künü Qırım ve Aqyarda sözde referendum keçirildi, onıñ neticesinde Qırım Rusiyeniñ terkibine kirdi.
Vaqıt keçken soñ Rusiye prezidenti Vladimir Pütin «yeşil adamçıqlar» rus askerleri olğanını itiraf etti.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
