Keçken senege nisbetten, Qırımda raatlanmaq içün soratma isteklerniñ sayısı «All inclusive» sistemasına köre 277%, Qırım turlarına köre 113% arttı.
Bu aqta kurort mevsimi ile bağlı olğan onlayn - seminarı devamında Rusiye nezaret astında bulunğan Qırım kurort ve turizm nazirliginiñ informatsiya bölüginiñ başı Anna Nerozina bildirdi.
«Er ay keçirilgen tedqiqatnıñ neticesinde, Qırımda raatlıq mevzusı boyunca Yandex sistemasınıñ eñ populâr soratmaları «All inclusive»nen bağlı, keçken senege nisbetten, bu sene olar 277% , Qırımğa turlarnen bağlı 131% arttı», - isaiyat ketirdi Nerozina.
Bunıñnen bir sırada raatlıq içün turistlerni Soçi, Gelencik ve Anapanıñ fiatları meraqlandıra.
«İnsanlar Qırımdaki fiatlarnı Soçi ve Krasnodar yeriniñ başqa kurort şeerlerinen qıyaslacaqlar», - dep añlattı Nerozina. Onıñ qaydlarına köre, kiçkene musafirhane segmentinde Qırım yeñe, obyektlerniñ yüksek keyifiyetli seviyesinde ise aksine yutqıza.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
