İnsanlar aq - uquqları boyunca Qırımdaki kontakt gruppasınıñ koordinatorı Abdureşit Cepparov fevral 12 künü apis etilgen müslümanlarnıñ dört ailesini ziyaret etti.
Aq - uquq qoruyıcınıñ fikirince, qorantalarğa tek uquq ceetten degil de, ahlâqiy ve ruhiy destek te kerek.
Mart 4 künü Abdureşit Cepparov Seyitler rayonında yaşağan Vadim Siruknıñ ailesini, ana-babası ve yigirmi üç yaşındaki ömür arqadaşını ziyaret etti.
Mart 5 künü Abdureşit Cepparov Qarasuvbazar rayonında yaşağan Müslim Aliyevniñ ana-babasını ziyaret etti. Olar bütün olıp keçken vaqialardan ale daa şokta olğanlarını bildirdiler.
Yerli din cemiyetiniñ reisi, Müslimniñ babası Nuri Aliyevniñ qayd etkenine köre, öz oğluna «doğru» terbiye bergen ve evlâdına qarşı yapılğan qabaatlarğa inanmay. 2006 senesinden başlap oğlı ailesinen beraber Aluşta şeerinde yaşamaqta. Müslimniñ ana-babası emin ki, oğlınıñ terrorizmnen iç bir alâqası yoqtır.
Öz nevbetinde uquq qoruyıcı apis etilgenniñ ana-babasına bir qaç tevsiye berdi. Onıñ qayd etkenine köre, Müslim Aliyevniñ tutıp qapatılması devamında qırım askerleriniñ areketleri daa çoq «spetsnaz ve avtomatçiklerniñ iştiragı ile boyeviklerden bir levhağa beñzey edi». «Eñ qorqunçlısı ise, bütün bu areketler balalarnıñ ögünde yapılmasıdır», - qayd etti Cepparov.
Fevral 11 künü, Qırımda, qırımtatarlarnıñ evlerinde bir sıra tintüvler keçirildi. Olarnıñ neticesinde 12 insan tutıp qapatıldı, sorğudan soñ çoqusı azat etildi. Rusiye nezaret astında bulunğan Qırım prokuror Natalya Poklonskaya «Hizb ut - Tahrir» adlı terroristik teşkilâtnıñ faaliyetinen bağlı cinayi işniñ açılması aqqında bildirdi.
Fevral 12 künü qapatılğan dört insan Müslim Aliyev, Emir - Üsein Kuku, Enver Bekirov ve Vadim Siruknı Qırımdaki mahkeme apis etmek qarırını aldı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
