Link açıqlığı

Avropa birligi tarafından Yanukoviç ve onıñ 15 safdaşlarına qarşı kirsetilgen sanktsiyalar ömürge keçti


Avropa Birligi Ukraina sabıq prezidenti Viktor Yanukoviç ve daa 15 sabıq memurlarğa qarşı tizilgen sanktsiyalarnıñ vaqıtını uzattı. Qarar mart 5 künü Avropa Birliginiñ resmiy jurnalında neşir etilgen soñ ömürge keçirildi. Bu aqta Azatlıq Radiosı bildirmekte.

Sıñırlav 2 sene evel, Yanukoviçniñ Ukrainadan qaçması neticesinde kirsetilgen, o, 2017 senesi mart 6 kününe qadar devam etecek.

Bunıñnen bir sırada, Avropa birligi Ukraina sabıq - naziri Nikolay Azarov, NBUnıñ sabıq yolbaşçısı Sergey Arbuzov ve SNBOnıñ sabıq kâtibi Andrey Klüyevke qarşı tizilgen sanktsiyalarnıñ vaqıtını uzattı.

Sağlıq saqlav nazirliginiñ sabıq naziri Raisa Bogatırövanı bu cedvelden çıqardılar, belli olğanı kibi, onıñ yurtdışında bir - de - bir aktivleri yoq.

Avropa Birliginiñ nazirleri sanktsiyalarnı uzatma qararını mart 4 künü Brüsselde keçirilgen toplaşuv devamında aldılar.

XS
SM
MD
LG