Krasnoperekopsk rayonı Voinka köyüniñ din cemiyeti reisi Şaib Suleymanovnıñ fikirince, rusiyeniñ mahsus hızmeti tarafından yapılğan tintüv - qırımtatarlar adına yollanılğan nevbetteki qorqutuv aktsiyasıdır.
Bu aqta o, Qırım.Aqiqatqa tarif etti.
«Belki de, adamlarnı qorquzmaq içün meni obyekt olaraq seçip aldılar. Bizim köyümiz Krasnoperekopsk rayonında eñ büyüktir. Mında tahminen 400 aile yaşamaqta. Añlaşılğanına köre, bu belli bir usuldır. Başqa iç bir şeynen bağlap olamayım», - dep ayttı Suleymanov
Bunıñnen bir sırada Krasnoperekopsk rayonıñ yerli meclis reisi Saniye Ametovanıñ fikirince, tintüvniñ sebepleri Suleymanov tarafından Qırım müftisi Haci Emirali Ablayevke qarşı yapılğan izaatlar ola bile. Amma Suleymanovnıñ özü DUMKS ya da onıñ yolbaşçılarını iç bir vaqıt tenqit etmegenini bildire.
Tintüvden soñ Qırım diniy idaresiniñ müftisi Suleymanovnı körüşüvge davet etti. Körüşüv devamında oña qol tutuvnı vade etti.
Bu vaqia aqqında Qırımnıñ rus uquq qoruyıcılarnıñ bir de bir resmiy izzatı yoq.
Omon askerleri ve başqa hızmetler müslüman din cemiyeti reisi Şaib Suleymanovnıñ evine tintüv keçirmek içün mart 3 künü keldiler. Öz areketlerini olar elde etilgen malümatlarğa esaslanğanlarını añlattılar. Olarğa köre Suleymanov öz evinde terakt azırlağan 10 adamnı saqlamaqta edi.
Nevbetteki künü, mart 4 künü, Qırım müslüman idaresi rusiye uquq qoruyıcılardan böyle areketlerniñ añlatmasını rica etti.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
