Link açıqlığı

Saatnıñ esas haberi

Qırım müftisi uquq qoruyıcılardan diniy cemiyet reisiniñ evinde keçirilgen titüvnen bağlı izaatlarını bekley


Qırım ve Aqyar diniy idaresinde bildirgenleri kibi, Müfti Krasnoperekopsk rayonnıñ «Din yolu» adlı müslüman cemiyeti reisi Şaip Suleymanovnıñ evinde keçirilgen tintüvnen raatsızlana.

Matbuat hızmette haber etkenlerine köre, tintüv aqqında tavsilâtlı malümat ve sebeplerini ögrenmek içün, müfti cemiyet reisinen körüşüv keçirdi.

«Suleymnovnıñ sözlerine binaen, uquq qoruycı organlarnıñ vekilleri tintüvniñ keçirilmesinen bağlı makeme qararını kösterdi, amma qararnıñ köpisâsını bermedi. Öz areketlerini arbiy adamlar olarğa bir malümatnıñ kelmesinen izaatladılar. Sanki Şaip Suleymanov öz evinde teraktnı azırlağan on insannı saqlamaqta. Şaip Suleymanov bu malümatnı red etti. Evindeki tintüv beş saatten ziyade devam etti. Uquq qoruyıcı organlarınıñ malümatı tasdıqlanmadı», - dep añlatıla matbuat hızmette.

Müftiy Suleymanovnı «öz işine insafnen yanaşqan, iç bir vaqıt islâm dinniñ bir - de - bir aqıntı azası olmağan, müslümanlarnıñ ürmeti ve itibarına nail olğan biri» kibi tanımaqta.

Körüşüv neticesinde Haci Emirali Ablayev Müftilikniñ uquq hızmetine belli organlarğa Suleymanovnıñ evinde keçirilgen tintüvnen bağlı añlatmasını istep muracaat yollamağa emir etti, qayd ettiler matbuat hızmette.

Mart 3 künü Suleymanovnıñ evinde keçirilgen tintıv aqqında qırımtatar milliy Meclisi yolbaşçısınıñ birinci muavini Nariman Celâl bildirdi. Onıñ sözlerine binaen tintme neticesinde müslüman cemiyetiniñ reisinde kitaplar tutıp alındı.

Qırım uquq qoruyıcı organlarnıñ bu mevzunen bağlı izaatları berilmedi.

Mart 1 künü Qırımnıñ Yedi Quyu rayonnıñ meclis reisi Lenur Ablâzimov da rus uquq qoruyıcılarnıñ tarafından «ziyaret»etildi.

Uquq qoruyıcılar ve Meclis azaları qayd etkenleri kibi, Rusiye tarafından Qırım işğal etilgen soñ, yarımadada qırımtatarlarnıñ evlerinde ve camilerde bu kibi tintüvler sıq ötkerilip başladı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG