Qırımtatar milliy Meclisi yolbaşçısınıñ birinci muavini Nariman Celâl haber etkeni kibi, Mecliste ve onıñ menfaatını qorçalağan advokatlarda qapatılma meselesinen bağlı Rusiye qırım prokuraturası makemege teslim etken vesiqalar ale daa yoq.
Bu aqta o, Qırım.Aqiqat radiosınıñ efirinde bildirdi.
Celâlnıñ qaydlarına köre, Qırım prokuraturası evel bergen vesiqalarğa binaen, Meclisni ekstremizmde qabaatlamaq ve onıñ faaliyetini yasaq etmek içün temel yoq.
«Bizge fevral 15 künü teslim etilgen vesiqalarnıñ, böyle deyik, itibarı büyük degil. Prokuratura tünevin qoşqan vesiqalar ise bizim elimizde daa yoq. Şimdiki vaqıtta vesiqalarnıñ kopiyası da bizge teslim etilmegen. Kün devamında yollamağa vade eteler», - dep ayttı Celâl.
Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Mart 3 künü, birinci oturışta cavacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince büyük ihtimal makeme prokuraturanıñ talabını qabul eter.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
