Elektriknen temin etüv ağlarında qaza yüz bergeni sebebinden, Canköyniñ merkeziy qısmı yarıqsız qalğan. Bu aqta Rusiye nezaret astında bulunğan Qırım akimiyetiniñ saytından bildirilmekte.
Şimdiki vaqıtta tamir işleri alıp barılmaqta.
Elektrikniñ yañıdan berilme zamanı belgilenmedi.
Qırım energo ağlarında qazalar an-aneviy olıp qalğan. Kubandan keçirilgen Energo köpür böyle yükke dayanamay, elektrik energiyasını toqtamadan temin etmek içün, Qırımnıñ kendi generatsiyasınıñ küçü yeterli degil.
Dekabr 30 künü Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkar etip, buña «tarihiy adaletniñ ğayrıdan tiklemesi» kibi baqa.
