Turkiye tış işler nazirliginiñ matbuat - kâtibi Tancu Bilgiç Rusiye tarafından yapılğan Qırım işğali ruhsetsiz olğanı aqqında hatırlatıp, yarımadada yaşağanlarnıñ aq-uquqları vaziyeti kerginleşkenini qayd etti, dep bildire «Anadolu» adlı turk agentligi.
«Biz Qırım meselesini eñ yüksek derecege çeşit halqara teşkilâtlarnıñ çerçivesinde köteremiz. Qırımnıñ qanunsız işğal etilmesinden 2 sene keçti. Yarımadada hususan qırımtatarlarğa qarşı, insanlarnıñ aq-uquqları bozulmaqta», - dep bildirdi Turkiye Tış İşler Nazirliginiñ matbuat kâtibi.
Bilgiç qayd etkeni kibi, bu deliller bir çoq mustaqil közeticiler tarafından berilmekte.
Amnesty International adlı halqara uquq qoruyıcı teşkilâtı 2015 - 2016 senesi boyunca dünyada insanlarnıñ aq qorçalamasınen bağlı yapqan neticege kore, Rusiye tarafından işğal etilgen yarımadanıñ kerçek Qırım akimiyeti «fikirlerni seslendirme imkânını, toplaşuv ve birleşmelerini evelki olğanı kibi sıñırlay edi».
Vesiqada qırımtatar halqı ve milliy Mecliske qarşı yapılğan repressiyalar, Ukrainağa qol tutqan faallerniñ yaqalanuvı aqqında söz yürütile.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
