Ukraina tış işler nazirliginiñ departamenti bildirgeni kibi, dünyanıñ bir sıra büyük memleketleri «Qırımnı işğal etici akimiyet tarafından yarımada ve Aqyar şeherinde ukrain grajdanlarına berilgen çetel pasportlarını qabul etmemekte öz birdemlikni bildirdiler». Bunı diplomatik hızmeti Feysbuknıñ saifesinde belgiley.
«Ukrainada yaşamaq içün izinleri olğan üçünci devletler grajdanları, Qırım cumhuriyeti ve Aqyar şeherinde qayd olunğan Ukraina vatandaşlarınıñ vizalı muracaatları tek Ukrainada akkreditatsiyanı keçken ecnebiy devletlerniñ konsul müessiselerinde baqıla bile», - dep izaatlay «İnterfaks-Ukraina» konsul hızmeti departamentiniñ mesacını.
Berilgen malümatlarğa binaen, Qırımda yaşağan ve mecburen başqa pasportnı alğan ukrain grajdanları çetel pasportnı almaq içün qıtalı Ukrainada yerleşken Devlet migratsiya hızmeti, onıñ bölügi ya da istegen territorial organğa öz vesiqalarını teslim ete bileler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
