Qırımda kurort mevsimi devamında içtimaiy nizamnı qorumaq içün adiy grajdanlar celp etilecek. Bu aqta Kreml nezaret astında bulunğan Qırım nazirler şurasınıñ yolbaşçı muavini Mihail Şeremet bildirdi.
Onıñ qaydlarına köre, kurort mevsimine qadar az vaqıt qaldı, yazda Qırımda daa çoq qanun bozma adiseler yüz bergeni sebebinden, içtimaiy tertipni imaye etmesi boyunca mevcut çare baqılmaq kerek, o ise adiy sakinlerniñ yardımı ile yapıla bile.
Qırım akimiyetiniñ matbuat hızmeti bildirgeni kibi, yarımadada bulunğan uquq qoruyıcı organlarnıñ vekilleri kurort mevsimi devamında akimiyet organları, uquq qoruma organları ve qırım cemaat teşkilâtları arasında munasebetlerniñ eyiliştirmesi kerekligi aqqında ayttılar.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
