Qırım devlet qurucılıq nezareti bugünki künde belediyeler qurucılıq siyaseti qaidelerine uymağan, işğalden evel Ukraina tarafından berilgen qurucılıq izinlerni lâğu etmege azır.
Bu aqta Kreml nezaret astında bulunğan Qırım nazirler şurasınıñ toplaşuvında, Qırım devlet qurucılıq nezareti reisi Sergey Timoşçenko «Krıminform» saytına bildirdi.
Böyleliknen o, Kezlev memuriyet yolbaşçısı Andrey Filonovnıñ çıqışı devamında, Qırımdaki qurucılıqnıñ 95% ukrain vesiqaları ile çalışqanı ve buña tesir etip olamağanları aqqında sözlerine cevap olaraq izaat berdi.
«Qırım Cumhuriyeti prokuraturasınıñ teşebbüsi ile, Qırım devlet qurucılıq nezareti Ukraina vaqıtında berilgen vesiqalarnı lâğu ete bile. Lütfen, eger quruculıq şimdiki qaidelerge uymağanını aytsañız, biz er şeyni toqtatırmız», - dep qayd etti o.
Timoşçenkonıñ bildirgenine köre, yerli akimiyet organları «qanunsız qurucılıqnı öz başına toqtata bile.» Keçken küzde qabul etilgen her bir qanun deñişmesine köre, kapital hususiyetli ya da olmağan inşaatnı, yerli öz - özüni idare etken organ kendi qararı ile binanı yıqtıra bile.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
