Avropa Birligi Ukraina sabıq prezidenti Viktor Yanukoviç ve daa 15 sabıq memurlarğa qarşı tizilgen sanktsiyalarnıñ vaqıtını uzattı, dep bildire Azatlıq Radiosı.
«Avropa birliginiñ elçileri Yanukoviç ve 15 insanniñ aktivleri qapalı olmasını devam ettirmek qararına keldiler. Mezkür qarar YES-niñ resmiy jurnalında cumaertesi künü neşir etilecek», - dep yazdı öz Twitter - nde Azatlıq Radiosınıñ mühbiri Rikard Yozvâk.
Yanvar ayında Avropa Birliginiñ diplomatları Qırım işğalinen bağlı olğan, Yanukoviç, onıñ safdaşlarına qarşı sanktsiyalarnıñ uzatılması aqqında debatlar keçirdi. Bu sanktsiyalarnıñ ameli mart 6 künü soñuna kelecek.
Wall Street Journal evelden haber etkeni kibi ukrain prokuraturası pervasız qalğanı içün, Yanukoviç ve onıñ etrafına qarşı olğan sanktsiyalarnı baarde lâğu ete bileler. Bu sanktsiyalar aktivlerniñ buzlatılması ve devletke kiriş yasağını nazarda tutmaqta.
Yanukoviç ve daa 15 memurlarğa qarşı bu kibi sıñırlama devlet maliyeni kendilerine qanunsız şekilde tabi etkenleri ve insan aq- uquqlarını bozmaları içün kirsetilgen. Ukrainanıñ mustaqilligi, territorial birligine qarşı çıqqan areketler sebebinden, Avropa sanktsiya cedveline 149 insan ve 37 şirket kirsetilgen.
