Link açıqlığı

Ukraina tış işler nazirligi yolbaşçısı Qızıl Qaçnı Qırım mabüslerniñ apiste keçindirme şaraitleriniñ teşkerüvini quvetleştirmege çağırdı


Mart 1 künü Ukraina tış işler nazirliginiñ yolbaşçısı Pavel Klimkin Qızıl Qaç halqara komitetiniñ prezidenti Peter Maurernen körüşüv keçirip, Rusiye tarafından işğal etilgen Qırımdaki mabüslerniñ keçindirme şaraitleri ile bağlı daa çalıq monitoringniñ keçirilmesine çağırdı.

Bu aqta Ukraina tış işler nazirliginiñ matbuat hızmeti bildirmekte.

«Nazir Qızıl Qaçnı Qırım cumhuriyeti ve Rusiyede apis etilgen ukrain grajdanlarnıñ keçindirme şaraitleri boyunca ileride daa diqqatlıca teşkerüvni yapmağa çığırdı, söz hususan Nadejda Savçenko, Öleg Sentsov, Aleksandr Kölçenko ve ayırıca hucur alda olğan Aleksandr Köstenko ve Yuriy Soloşenko aqqında yürütildi» - belgilene mesacda.

Bunıñnen bir sırada, Klimkin Donbassta yaşağan yerli sakinler içün gumanitar yardımınıñ teslim etilmesi sebebinden Ukraina ve Qızıl Qaçnıñ ilerideki işbirligiñ müimligi aqqında bildirdi.

Bundan evel haber etilgeni kibi, Klimkin OON toplaşuvında çıqışta bulunır eken, Qırımda insan uquq saasınıñ vaziyetini monitoringini keçirmek içün, yarımadada halqara teşkilâtları vekilleriniñ daimiy bulanuvı kerekligi aqqında ayttı.

Uquq qoruyıcılar bergen malümatlarğa köre, 2015 senesiniñ soñunda Rusiyede siyasiy sebebinden 21 ukrain grajdanlarnı tutıp qaldırğanlar.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG