Kiyev şeherinde yerleşken «Ukraina» adlı kinoteatrde rejissör Nariman Aliyevniñ «Qırım hikâyeleri» adlı rivayetniñ taqdim merasimi ötkerildi. Destanğa üç qısqa film kirdi, bular: «Saarnen qaytmaq», «Seni sevem», «Sensiz» - dep bildire Qırım.Aqiqat
«Üç işim de ayatımnıñ üç yılıdır. Üçüni de men Qırımda, vetanımda, evimde çıqardım, üçüniñ de qaramanları menim tuvğanlarım ve soy-aqrabalarım ola», - tarif etti Aliyev.
Qısqa filmlerniñ taqdim merasimine qırımtatarlarnıñ lideri Mustafa Cemilev de teşrif buyurdı. Onıñ qaydına köre, destanda «Qırım añlayışı» bar.
«Birinciden, bu film mevzunıñ aktualizatsiya semeresini, ekinciden, Qırımnıñ añlayışını taşıy bile. Çünki Ukrainanıñ 23 sene mustaqilligi devamında bu añlayış yoq edi. Siyasiy erbapları Qırımğa istimalcı olaraq baqa ediler. Tek seçimler vaqıtında, saylayıcılarnı celp etmek içün hatırlay ediler» - dep ayttı Cemilev.
Bunıñnen bir sırada taqdim merasiminde Camala, «KrımSOS» adlı cemaat teşebbüsniñ teşkilâtçılarından biri Tamila Taşeva ve rejissörnıñ ana-babası bulundılar.
Keçenlerde Qırımlı yaş rejissör Nariman Aliyevniñ «Sensiz» (2015) adlı qısqa film Berlinde keçirilgen 66-ncı halqara kinofestivalinde taqdim etilgen edi.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
