Bağçasarayda memurlar yerli sakinlerniñ şikâyetlerine pervasız qalmaqtalar, Kremlniñ nezaret astında bulunğan qırım akimiyetiniñ yolbaşçısı Sergey Aksönov hızmet taqiqatını keçirmege talap ete.
Qırım akimiyetiniñ matbuat hızmeti bildirgeni kibi, keçirilgen toplaşuv devamında nazirler şurasınıñ yolbaşçı muavini Larisa Opanasük qayd etti ki, 2015 senesi Bağçasaray ve rayonda yaşağan insanlarnıñ akimiyetke muracaatları 54% ve mütenasip 236% yükseldi.
«Hızmet taqiqatnı keçirmek, şikâyet ve muracaatlar cevapsız qalğan sebeplerini ögrenmek, olarnı kim baqacaq edi, kim mesülietli edi ve bu kibi problemlerini çezmek içün memuriyet reisi nasıl tedbirler keçirgenini ögrenmek», - dep ayttı Sergey Aksönov.
Bunıñnen bir sırada o, adamlardan kelgen şikâyetlerni akimiyet organğa yollamağa yasaq etti.
«Men bunı yasaq etem ve bunı birden protokol boyunca qarar olaraq resmiyleştiriñiz, sakinlerniñ muracaatlarını olar şikâyet etken akimiyet organğa yollamağa yasaqtır. Yuqarıca olğan organğa yollañız», - dep qayd etti Aksönov.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
