Link açıqlığı

Saatnıñ esas haberi

Çubarov ve Cemilev Kiyevdeki studentlerge 2014 senesi fevral 26 künniñ vaqiaları aqqında tarif ettiler


Salı künü, martnıñ 1-nde, Kiyevdeki Halqara munasebetler institutında Qırımda apis etilgen qırımtatar meclisiniñ birinci muavini Ahtem Çiygozğa bağışlanğan açıq lektsiya ötkerildi.

Tedbir çerçivesinde ukrain haber siyaseti nazirligi «Qırım. Qarşılıq» adlı vesiqalı filmni taqdim etti. Film qaramanı Qırımnıñ işğali meselesini añlamaq içün, Ukrainağa kelgen, amerikalı jurnalist oldı.

Qırımtatarlarnıñ liderleri Mustafa Cemilev ve Refat Çubarov studentler ögünde çıqışta bulundılar, olar 2014 senesi fevral 26 künü olıp keçken vaqialarnıñ hatırlavlarınen paylaştılar.

Körüşüv devamında studentler Mustafa Cemilev ve Refat Çubarovğa yarımadanı işğal etilmesine ketirgen vaqialar ve Qırımnıñ Ukrainağa qaytarılmasınen bağlı sualler berdiler.

«Bazıları: fevral 26 künü mitingke çıqıp nege iriştiñiz? - dep soraylar» Siz toplaştıñız, qarar alınacaq sessiyanı, ya da, böyle deyik, Rusiyeden soracaq yardım muracaatı tedbirini keçirmege bermediñiz. Siz yalıñız bir künge Qırım işğalini çetke çektiñiz. Amma o kün, fevralniñ 26 ve meydanda bulunğan insanlar, öz areketlerinen işğalni tek bir künge degil, olar Qırım Rusiyege özü qoşulmaq istegeni aqqında uydurmanı ebediyen kömdiler», - dep qayd etti Refat Çubarov.

Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG